ⴰⵖⵓⵍⵏⵜ ⵜⵏⵥⴰⵕⵉⵏ ⵜⵉⵖⴰⵔⵉⵡⵉⵏ ⵏ ⵜⵣⵣⵉⴳⵣⵜ ⵏ ⵜⴰⵜⵉⴽⵏⵓⵍⵓⵊⵉⵜ ⵜⴰⵎⵙⵙⵉⴷⵔⵜ ⴳⴰⵏⵜ ⵜⵉⵏⵥⴰⵕ ⵜⵉⴽⵙⵡⴰⵜⵉⵏ ⴷ ⵢⵓⴳⴳⴰⵏ ⴳ ⵢⵉⴳⵔ ⵏ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵉⵙⵡⵓⵜⵜⵙ ⵓⵔⵎⵎⵓⵙ ⵏ ⵜⵖⴰⵔⵉⵡⵉⵏ ⵜⵉⴱⵢⵓⵍⵓⵊⵉⵢⵉⵏ ⵃⵎⴰ ⴰⴷ ⵜⵜⵓⵙⵙⵉⵜⴳⵏ ⵉⴷⵔⵉⵣⵏ ⵓⵙⵏⵉⵙⵏ ⴷ ⵉⵎⵉⵥⵉⵕⵏ ⵏ ⵜⵣⵣⵉⴳⵣⵉⵏ ⵅⴼ ⵓⴼⵔⵉⴷⵏ ⴷ ⵜⵙⵓⵜⵉⵏ ⴷ ⵉⴷⴷⴰⵏ, ⴷ ⵜⵡⵏⵏⴰⴹⵜ ⴷ ⵓⴳⴰⵔⴰⵡ ⴰⵎⴰⴷⴷⴰⵔ, ⴷ ⵜⵣⵔⴰⵡⵜ ⵏ ⵓⵙⵖⵍ ⵏ ⵓⵙⴽⴰⵔ ⵙ ⵉⵎⵏⵣⴰⵢⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⴷⵔⴼⵉⵏ ⵜⵉⴷⵙⵍⴰⵏⵉⵏ. ⵉⵙⵎⴰⵍ ⵓⴳⵔⴰⵡ ⵏ ⵍⵢⵓⵏⵉⵙⴽⵓ ⵏ ⵓⵙⴳⴳⵯⴰⵙ 2005 ⴰⵍⵖⵓ ⴰⵎⴰⴹⵍⴰⵏ ⵏ ⵜⵖⴰⵔⵉⵡⵉⵏ ⵜⵉⴱⵢⵓⵍⵓⵊⵉⵢⵉⵏ ⴷ ⵉⵣⵔⴼⴰⵏ ⵏ ⵓⴼⴳⴰⵏ ⵏⵏⴰ ⵉⵙⵡⵓⵜⵜⵙⵏ ⴰⵙⴷⵓⵙ ⵏ ⵓⵎⵏⵣⴰⵢ ⵏ ⵓⵣⵔⴰⴽ ⵏ ⵡⴰⴷⴷⵓⵔ ⴰⵏⴼⴳⴰⵏ ⴳ ⵓⵔⵣⵣⵓ ⴰⵎⴰⵙⵙⴰⵏ. ⴳ ⵓⵙⵡⵉⵔ ⴰⵏⴰⵎⵓⵔ, ⵎⵇⵇⴰⵔ ⵜⵍⴰ ⵜⵉⵔⵛⵜ ⵜⵓⵍⴳⵉⵏⵜ ⵉⵙⵙⵓⵜⵜⵉⵢⵏ ⵉ ⵢⵉⴳⵔ ⵏ ⵜⵖⴰⵔⵉⵡⵉⵏ ⵜⵉⴱⵢⵓⵍⵓⵊⵉⵢⵉⵏ ⵜⵉⵏⴷⵉ, ⵓⵔ ⴷⴰ ⵜⵜⵎⵓⵏ ⴰⴽⴷ ⵜⵏⵥⴰⵕ ⵜⵉⵣⵔⴼⴰⵏⵉⵏ ⵏⵏⴰ ⵙⵔⵓⵙⵏⵜ ⵜⵣⵣⵉⴳⵣⵉⵏ ⵜⵉⵙⵓⵍⴰⵏⵉⵏ ⴳ ⵢⵉⴳⵔ ⵏ ⵜⴰⵜⵉⴽⵏⵓⵍⵓⵊⵉⵜ.
ⴰⵔ ⵢⴰⴽⴽⴰ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵜⵉⵏⴷⵉ ⵎⵇⵇⵓⵔⵏ ⵉ ⵜⵖⴰⵔⵉⵡⵉⵏ ⵜⵉⴱⵢⵓⵍⵓⵊⵉⵢⵉⵏ ⴳ ⵜⴰⵏⴰⴹⵉⵏ ⵏⵏⵙ ⵜⵉⵙⴳⵯⵙⴰⵏⵉⵏ ⵏⵏⴰ ⴳ ⵉⵜⵜⴼⵙⴰⵔ ⵜⵉⵢⴰⴼⵓⵜⵉⵏ ⵏ ⵓⴹⴼⴼⵓⵕ ⵏⵏⵙ ⵉ ⵜⵣⵣⵉⴳⵣⵉⵏ ⴳ ⵢⵉⴳⵔ ⴰⴷ, ⵉⵙⵎⵏⵉⴷ ⴳⵉⵙⵏⵜ ⵉⵙⵖⵍⴰⴼ ⵉⵜⵜⵙⴷⴷⵉⴷⵏ ⵅⴼ ⵜⵉⵏⴷⵉ ⵏ ⵡⵓⵜⵓⵢ ⴷ ⵓⴹⴼⴼⵓⵕ ⵏ ⵜⵎⵙⴽⵔⵉⵏ ⵜⵉⵏⴰⵔⴰⵎⵉⵏ ⴳ ⵓⵙⵍⴳⵏ ⴷ ⵉⵎⵏⵣⴰⵢⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴷ ⵓⵙⵉⴷⴼ ⵏ ⵜⵖⴰⵔⵉⵡⵉⵏ ⵜⵉⵎⵙⵏⵉⵊⵊⵉⵜⵉⵏ ⴷ ⵜⴱⵢⵓⵍⵓⵊⵉⵢⵉⵏ ⴳ ⵉⵙⴰⴽⴰⵜⵏ ⵏ ⵓⵙⵎⵓⵜⵜⴳ ⴷ ⵡⴰⵎⵎⴰⵙⵏ ⴷ ⵉⵙⴰⵔⵎⵏ ⵏ ⵓⵔⵣⵣⵓ ⴰⵎⴰⵙⵙⴰⵏ, ⵙ ⵓⵙⵎⴰⵇⵇⵍ ⵙ ⵓⴳⵓⴷⵉ ⵏⵏⴰ ⵉⵡⵉⵏⵜ ⵜⵎⵙⴰⵔⵉⵏ ⵏ ⵜⵖⴰⵔⵉⵡⵉⵏ ⵜⵉⴱⵢⵓⵍⵓⵊⵉⵢⵉⵏ ⴳ ⵜⴰⵙⵙⴰⵙⵜ ⵏ ⴽⵓⴼⵉⴷ-19, ⵉⵙⵙⴽⵕⵥ ⵓⵙⵇⵇⵉⵎ ⵅⴼ ⵓⵙⵓⵖⵏ ⵏ ⵓⵙⵡⵓⴷⴷⵓ ⵏ ⵜⵙⵔⵜⴰⵢ ⵜⵉⴷⵓⵙⴰⵏⵉⵏ ⵜⵉⵏⴰⵎⵓⵔⵉⵏ ⵜⵉⵣⵉ ⵏ ⵜⴰⵙⵙⴰⵙⵉⵏ ⵜⵉⵎⵙⵏⵉⵊⵊⵉⵜⵉⵏ ⵙ ⵜⵎⵏⵜⵉⵍⵉⵏ ⵉⵖⴰⵔⵉⵡⵉⵏ ⵙ ⵓⵎⵙⴰⵙⴰ ⴰⴽⴷ ⵉⵏⴰⵡⴰⵢⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵉⵙⵍⴳⵏⵏ ⵏⵏⴰ ⵜⵏ ⵉⵙⵏⵎⴰⵍⴰⵏ.
ⵉⵙⴳⵎⴹ ⵓⵙⵇⵇⵉⵎ ⴷ ⵜⵎⴰⴷⴷⴰⵙⵜ ⵏ ⵍⵢⵓⵏⵉⵙⴽⵓ, ⴳ 06 ⵢⵓⵏⵢⵓ 2022, ⵜⴰⵎⵢⴰⵇⵇⴰⵏⵜ ⵏ ⵜⵎⴷⵔⴰⵡⵜ ⵉⵙⵖⴰⵡⵙⴰⵏ ⵙ ⵙⵎⵎⵓⵙ ⵏ ⵉⵙⴳⵓⵎⵏ ⵉⴷⵙⵍⴰⵏⵏ, ⵙⴳⵉⵙⵏ ⴰⵙⴱⵓⵖⵍⵓ ⴷ ⵓⵙⴷⵓⵙ ⵏ ⵓⵔⵣⵣⵓ ⴰⵎⴰⵙⵙⴰⵏ ⵏ ⵜⵎⵏⵜⴰⵍ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵖⴰⵔⵉⵡⵉⵏ ⵜⵉⴱⵢⵓⵍⵓⵊⵉⵢⵉⵏ. ⵎⴽⵍⵍⵉ ⵉⵕⵥⵎ ⴳ ⵓⵙⴳⴳⵯⴰⵙ ⴰⵏⵏ ⵏⵉⵜ ⵉ ⵜⵣⵔⴰⵡⵜ ⵅⴼ ⵓⵕⵚⵚⴰ ⵏ ⵜⵖⴰⵔⵉⵡⵉⵏ ⵏ ⵜⴱⵢⵓⵍⵓⵊⵉⵜ ⴳ ⵢⵉⴳⵔⴰⵏ ⵏ ⵜⵉⵍⴰⵍ ⵜⵉⵎⵙⵏⵉⵊⵊⵉⵜⵉⵏ ⴷ ⵉⵔⵣⵣⵓⵜⵏ ⵉⴱⵢⵓⵍⵓⵊⵉⵢⵏ ⵉⵎⵙⵏⵉⵊⵊⵉⵜⵏ, ⴳ ⵓⵙⵡⵉⵔ ⵏ ⵉⵣⵣⵔⴰⴼⵏ ⴷ ⵉⵙⵍⴳⵏⵏ, ⴷ ⵓⵍⴰ ⴳ ⵜⵙⴳⴳⵯⵉⵏ ⵜⵉⵎⵔⵙⴰⵍⵉⵏ ⴷ ⵜⵎⴰⴷⴷⴰⵙⵉⵏ, ⴷ ⴳ ⵜⵣⴷⴰⵢⵜ ⵓⵍⴰ ⵙ ⵉⵙⴰⴽⴰⵜⵏ ⵏ ⵓⵙⵎⵓⵜⵜⴳ ⴷ ⵓⵙⵉⵔⵎ ⵏ ⵉⵣⵣⵓⵍⴰⵏⵏ ⴳ ⵢⵉⴳⵔⴰⵏ ⵏ ⵜⵙⵏⵉⵊⵊⵉⵜ ⴷ ⵓⵔⵣⵣⵓ ⴰⵎⴰⵙⵙⴰⵏ.
ⵉⵙⵡⵓⵔⵉ ⵓⵙⵇⵇⵉⵎ ⵖⵉⵍⴰⴷ ⵅⴼ ⵜⵙⴽⵔⴰⵡⵜ ⵏ ⵜⵣⵔⴰⵡⵜ ⵖ ⵓⴱⴰⵔⴰⵣ ⵅⴼ ⵜⵉⵏⴷⵉ ⵏ ⵜⵖⴰⵔⵉⵡⵉⵏ ⵜⵉⴱⵢⵓⵍⵓⵊⵉⵢⵉⵏ ⴳ ⵉⵖⴰⵡⴰⵙⵏ ⵏ ⵓⵙⵍⵎⴷ ⴷ ⵓⵙⵎⵓⵜⵜⴳ ⴷ ⵓⵔⵣⵣⵓ ⴰⵎⴰⵙⵙⴰⵏ, ⵙⵍⴰⵡⴰⵏ ⴰⴽⴽⵯ ⴳ ⵢⵉⴳⵔⴰⵏ ⵉⵣⴷⵉⵏ ⵙ ⵜⵎⴰⵙⵙⴰⵏⵉⵏ ⵏ ⵜⵓⴷⵔⵜ ⴷ ⵜⴷⵓⵙⵉ ⴷ ⵜⴰⵜⵉⴽⵏⵓⵍⵓⵊⵉⵜ ⵜⴰⵎⵙⵙⴰⴷⵓⵔⵜ.
